НҮБ-ын Статистикийн комиссын 41-р чуулганд оролцсон ҮСХ-ны дарга С.Мэндсайхан тэргүүтэй төлөөлөгчид БНСУ-ын Статистикийн Газрын дарга хатагтай И Инcил-тэй АНУ-ын Нью-Йорк хотноо байрлах НҮБ-ын төв байранд  өнгөрөгч 2 дугаар сарын 23 -ны өдөр уулзлаа.
Монгол улсын ҮСХ хосолмол түншлэлийн МОНСТАТ төслийн хүрээнд БНСУ-ын статистикийн байгууллагатай хамтран ажиллах боломж гарч буйд  тааламжтай байгаагаа Хорооны дарга С.Мэндсайхан илэрхийллээ. БНСУ-ын Статистикийн Газрын дарга хатагтай И Инсил төслийн хүрээнд мэдээллийн технологийн чиглэлээр Монголын статистикийн салбарын чадавхийг бэхжүүлэхэд хувь нэмрээ оруулах болж байгаад баяртай байгаагаа илэрхийллээ.
  Уулзалтын үеэр КОЙКА байгууллагатай төсөл хамтран хэрэгжүүлэх тал дээр БНСУ-ын Статистикийн Газрын идэвхитэй дэмжлэгийг авахыг хүсч байгаагаа Хорооны дарга С.Мэндсайхан илэрхийлсэн бөгөөд үүний тулд  хоёр улсын засгийн газар хоорондын хамтын ажиллагааны тэргүүлэх чиглэлийн хүрээнд статистикийн салбарын чадавхийг бэхжүүлэх чиглэлийг багтаан оруулах талаар Монголын талын зүгээс чармайлт гаргахыг  Солонгосын тал онцоллоо...
Монгол улсын статистикийн салбарыг хөгжүүлэх, түүний чадавхийг бэхжүүлэх талаар БНСУ-ын статистикийн байгууллагатай үр ашигтай, нягт хамтран ажиллаж, цаашид хамтын ажиллагаагаа улам бүр өргөжүүлэн хөгжүүлнэ гэдэгт найдаж байгаагаа Хорооны дарга мэдэгдлээ. ҮСХ-ын дарга С.Мэндсайханы зүгээс эдгээр зорилтын хүрээнд өөрийн тааламжтай үедээ Монгол улсад ҮСХ-нд айлчлах урилгыг БНСУ-ын Статистикийн Газрын дарга хатагтай И Инсил талархан хүлээн авлаа.
Уулзалт найрсаг, ажил хэрэгч уур амьсгалд амжилттай болж өнгөрлөө.